Son catedrático de economía na Universidade de Vigo, onde pertenzo ao Departamento de Economía Aplicada e a Rede, un grupo de investigación consolidado que aborda os aspectos económicos relacionados coa innovación, a enerxía e o medio ambiente. Na UV imparto docencia de economía pública e ambiental, e coordinei o máster en xestión do desenvolvemento sustentable durante sete anos. Son tamén catedrático (a tempo parcial) no European University Institute, en Florencia, onde dirixo a Florence School of Regulation-Climate.

A miña investigación sitúase na fronteira entre a economía pública, ambiental e enerxética. Publico nas principais revistas académicas do meu campo e participo asiduamente, en moitos casos como organizador, en congresos e seminarios académicos. Teño dirixido abundantes proxectos de investigación, públicos e privados, e realicei estadías en varias universidades internacionais. Ademais, fun autor líder do Grupo Intergubernamental sobre Cambio Climático da ONU para a elaboración do seu Quinto Informe de Avaliación (completado en abril de 2014). O IPCC ten como finalidade subministrar ao mundo unha visión científica clara sobre o actual estado do coñecemento sobre o cambio climático e os seus potenciais impactos ambientais e socio-económicos.

Son director de Economics for Energy, un centro de investigación privado especializado na análise das cuestións enerxéticas. Participado por universidades, empresas e administracións públicas e cun estreito contacto con institucións similares internacionais, o centro busca crear e transmitir coñecemento riguroso, neutral e útil aos distintos axentes da sociedade española. Son tamén coordinador de Ergon, un consorcio de investigación que pretende explorar en profundidade os aspectos económicos da eficiencia enerxética e unha das iniciativas máis importantes de Economics for Energy.

Sempre perseguín que o meu traballo académico resposte, con rigor e neutralidade, a necesidades sociais e conte cunha ampla difusión. O meu curriculum completo recolle as miñas actividades de docencia, investigación e xestión do coñecemento.